Gia l'onn 1947 ha Carl Eduard Gruner, inschigner e planisader da traffic, skizzà l'idea d'ina tunnel da basa dal Gottard tranter Amsteg e Bodio. Fin a la realisaziun èn dentant passads anc plirs decennis.

Dapi il «gea» dal pievel svizzer fin a la perfuraziun principala han fin a 2400 lavurantas e lavurants construì durant bunamain dus decennis duas galarias d'ina lunghezza da mintgamai 57 kilometers. Ils 15 d'october 2010 ha gì lieu finalmain la perfuraziun principala da la galaria ost.

La maschina da perfurar il tunnel dal Gottard era circa uschè lunga sco quatter plazzas da ballape messas ina suenter l'autra. Il chau da ses tarader rumpeva giu il crap che vegniva manà davent cun in roda da palas sur ina tschinta da transport. Differents mecanissems da segirezza protegivan cunter crappa che sa distatgava dal grip. En la maschina sa chattavan tut las materialias che vegnivan duvradas – saja quai per proveder il tarader dal tunnel, per transportar davent il material d'exchavaziun ed auter pli.

Ina gronda part dal material exchavà è turnà en il tunnel en furma da betun. Il material restant è per exempel vegnì duvrà per furmar il terren u per mantunar rempars. En il Lai d'Uri èn vegnidas stgaffidas trais inslas da protecziun da la natira e trais inslas da far bogn.

Il tunnel da basa dal Gottard n'è betg mo il pli lung tunnel da viafier dal mund, mabain er il pli profund. En tscherts lieus mesir’ins passa 2000 meters grip tranter il tunnel e la surfatscha da la terra.

Durant passa 3 onns han 125 lavurants installà il vial en il tunnel da basa dal Gottard, e quai en in manaschi da 24 uras e durant 7 dis ad emna. Tranter auter han els duvrà 131 000 m³ betun, han mess 290 km rodaglias e 380 000 traversas.

Uschè lung è l'entir tunnel da basa dal Gottard, sch'ins quinta ensemen tut las galarias, tut ils tumbins da colliaziun e d'access sco er las duas galarias principalas.

Circa 260 trens da martganzia e 65 trens da persunas vegnan ad ir en l'avegnir mintga di tras il tunnel da basa dal Gottard. Ils trens da martganzia cuntanschan ina sveltezza maximala da 160 km/h ed ils trens da persunas 200 km/h (pli tard schizunt fin 250 km/h).

Ch'il temp da viadi sa reducescha, sentan ins pass per pass a partir da l'onn 2016. Suenter la terminaziun da las lavurs sin l'entira axa dal Gottard (incl. tunnel da basa dal Ceneri e trajects d'access) spargnan las passagieras ed ils passagiers var 45 minutas per il viadi da Turitg a Lugano u viceversa.